ما بيكفّي كل شي صار فينا؟
ما شبعتوا وجع؟ ما ارتويتوا دم؟
إسرائيل عم تحرقنا بالقذائف…
وإنتو، تجّار الوطن، عم تكفّوا عليها بالحطب!
اللي عم يبيع حطب الغابة متل اللي عم يبيع كرامة الوطن،
اللي عم يتاجر بخبز الناس متل اللي عم يبرّر الدم…
كلّن عم يحرقونا — واحد بالنار، والتاني بالسكوت، والتالت بالكذب!
صرنا بلد عم يبكي دم،
واللي دمّرونا عم يسألوا بدموع التماسيح:
“ليش هيك صار؟”
صار لأنو نحنا نسينا شو يعني نكون بشر،
نسينا شو يعني نحب الوطن بلا مصلحة.
أنا كفنان، قلبي عم ينفجر متل الوطن،
صرختي مش سياسة، صرختي إنسانية:
خافوا الله بهالبلد، بخضار الجبل، بدم الشهدا، بعيون الولاد!
لبنان مش سلعة، مش مشروع، مش مزرعة.
لبنان وجّ، ووجّو احترق…
بس بعد في ناس، بعد في ضوّ،
بعد في قلوب بتحب هالأرض أكتر من حياتها،
وإذا النار أكلت الشجر،
رح نزرع بالرماد وطن جديد…
من وجعنا، من حبّنا، من صرختنا.
في الله
جان بو جدعون-
