الأب فادي روحانا-
ما تحبّني بالهدايا، الهدايا بتعتق….
ما تحبّني بكلمات غرام، الكلمات متل المي بتتبخر…
ما تحبّني بأغاني، الأغاني بتبوخ…
ما تحبّني بغمرة، الغمرة بتصقّع…
ما تحبّني بعمل خير، الخير بينتسى…
حبني بضعفي، بتجاعيدي، بتعبي، بعصبيتي، بعيبي…
حبني بوقتك حدي ومعي…
حبني بإصغاءك لهفواتي…
حبني بنظراتك بعمق عيوني…
حبني بقبولك لشكلي…
حبني بدقات قلبك…
هونيك الحب بيعتق بس بيغلى، بيثبت وما بيتبخر، بيتجدد وما بيبوخ، بيولع وما بينطفي، بيصير أبدي…
ما تلبّس حبنا اكسسوارات بل صلوات…
الحب متل موقدة كانون بدّو حطب وإلا بيرمّد… حط بالموقدة حطب الصلاة، والاحترام، والامانة… واتركني دافي كل المواسم… ويغارو منّي كتار كيف راحت تجاعيدي، وتجمّل عيبي بدقات قلب…
