زياد الرموز-
وبعدين؟!؟! هيك بدنا نقضّيها؟! ولأمتين؟!؟ من كارثة لكارثة ومن حرب لحرب لك بعد ما لملمنا حالنا من انفجار مرفأ بيروت وبعد ما نشفّوا جروحاتنا وجروحات الناس ولون الاسود بعد ما انشلح وشرايط البيض بعدن من درابزين لدرابزين…. شوفي هلق شو صار؟! قتل بقتل؟! وضرب وتهجير ؟!؟ شي على الطريق وشي بالمدارس وشي ما عارفين ربنا وين حاططن… لك يلي عم يصير كرمال شو وكرمال مين؟! مين الربحان ومين الخسران.. لك والله الروح أهم من الارض وتراب الارض.. كلّه بيتعوّض الا بني آدم… لك يا حرام على بني آدم.. هلّق ما عم خبّرك حتى نبكي ونقّ.. عم خبّرك لأن بعرفك إم الهمم وإم الفقرا والمشردين والمعترين.. قوليلي شو لازم ينعمل؟!؟ وقت مرفأ بيروت قلتلك جايي الشتي والناس بلا شباك وبلا باب… هلق جايي الشتي والناس بلا سقف وبلا حيطان وبلا تعتير… بكرا ببلشوا يلمّوا عليهن وينصبوا على ضهر وجعهن وحزنن… لك آخ شو بدنا نحكي.. شي جمعيات ما معروف قرعة بيّها منين بتاخد اسامي هالعيل وبتجيب تمويل وما بتعود تبيّين…. وشي جمعية بتستغلّ حاجتن وعوزهن تتصوّرهن عم يناشدوا ويستنجدوا حتى يجيها تمويل وبالآخر بتوزعلهن رغيف خبز… وشي مطران وغيره بسافر بجولة اوروبية حتى يلمّ مساعدات من المغتربين كرمال هالنازحين… بيرجع المطران لاوي رقبته ايد ورا ايد قدام وبطمنّا انه صلالنا وصلالن وانه الجالية اللبنانية تعاطفت معهن بس كيف ما كيف ما منعرف شي…
سامحيني مقهور على يلي عم شوفو، مقهور على هالناس يلي راحوا من هالدني ويلي راحوا من بيوتن ويلي راح رزقن وبيتن وتعبن، مقهور من ناس دجّالين من سياسيين و رجال دين وجمعيات تستغل هالظرف كرمال مصالحها الشخصية… مقهور ايه مقهور كل ما اقول بدنا نعمل شي يفرّح هالناس يضحّك هالناس منلاقي حالنا رجعنا غرقنا بوجع ما خلّا لللفرح مطرح وبصير كل همّنا نلملم جروحاتن ونقلّن مرحلة وبتمرق…
ليه ساكتي؟! احكي؟! زعلانة ومقهورة انتي كمان؟! هيدا كله ما بينفع… استئذني من ربنا واتركي السما والجنة وارجعي على الارض هون نحنا بحاجة الك… هالناس بحاجة الك.. انا بحاجة الك.. شمّري على زنودك واركضي معنا.. اركضي عند مطرح ما يلي شفتيه وندهلك قلّك انا عطشان… وعند يلي عم يقلّك انا جوعان… وعند يلي مش قادر يبكي وبدو كلمة حتى يبكي…
ارجعي ارجعي بجاه يلي ندرتي حياتك قلو ارجعي .. ارجعي عم يقتّلوا بعضن وعم يقتلونا معهن.. ارجعي قوليلن روحوا انقبروا كل واحد يلعب قدّام بيتو.. اتركوا هالناس تعيش.. اتركوا هالناس تعيش.. قوليلن انقبروا بقا بدنا نعيش ! بدنا نعشلنا يومين متل الخلق.. بدنا نعيش قبل ما نموت!،
ارجعي ارجعي يا صديقتي حتى نمشي على خطاكي نلملم هالناس يلي فرشت حالها على الارض.. ارجعي علمينا كيف الانسان بيبذل حاله للخدمة بينسى لبسه وبينسه صحته كرمال خيّو الانسان… ارجعي حتى نقلّن الدني بعدا بألف خير ولا البدّ ما الخير ينتصر يمكن مش على ايامنا بس عل قليلي ننبشّر بالخير يلي جايي كرمال يضلّ عندن أمل ببكرا.
ارجعي حتى نقول صحيح يلي عم نعمله نقطة بالمحيط بس بلا هالعمل المحيط رح ينقص نفطة.
