(شعر: أنيس معوشي)

الله يعطيني الإيّام

وأعمُل متلَك يا بَيّي

ولنّو أوفي عالدّوام

نُصّ الدَّين اللّي علَيّي

بشبابَك كنت بتِحكي

تخَبّرني ياما تِتكي

عَ مخدِّةْ تختَك تبكي

تفكِّر بالمسؤوليِّه ..

وكنت تقِلّي يا إبني،

أوعا ما بعُمرَك تِحني

لـْ بَدّو المِستقبل يِبني

الوَقفِه بدّا رجُوليِّي ..

كبِرت ومَرّوا هالأعوام

وصار عندي عيلِه هديِّه

وتَ ما إنسى هالكلام

ويُخلَص هالعُمر وإنلام

كتبتُن لَـ ولادي وْصِيِّه …