بقلم الأب بيتر حنا –
ما فيه شك إنو الهدف من قصف كنيسة آيا صوفيا أثناء تدشينها بمدينة السقيلبية، هوي تخويفنا..
ولكن، رح نخبركن كلمتين:
إنتو زيادة على إنكن إرهابيين،
إنتو جبناء،
لأن هيدا التفجير سلاح الجبان،
الجبان بخاف من وجود غيرو..
الجبان ما بيتحمل وجود غيرو..
وبدل ما يواجهو بالحقيقة، بواجهو بالسلاح..
الصواريخ مع الأشخاص المناسبين،
لأن بالأساس اخترعوها للجبناء،
أما نحنا، مش بحاجتها،
لأن عنا الكلمة وثقافة الحياة، والأهم عنا الرب اللي حامينا،
رح يضل وجودنا يخوفكن، هيدي هيي الحقيقة الأولى..
والحقيقة التانية، مجرمين وجبناء، إنتو واللي داعمكن..
شهداءنا، اللي ماتو كرمال المسيح، صارو مع المسيح اللي مات كرمالن من الفين سنة،
مبروك لكل شهيد شهادتو..
عالقليلة، استشهدو كرمال يعطو حياة لغيرن،
مش متلكن، بتستشهدو كرمال تقتلو غيركن..
نحنا باقيين هون، ورح نعيش مع المسيح هون،
ورح نحمل إسمو بكل شرف،
إسمنا “مسيحيين”
تذكرو هالاسم منيح..
