زينا خليل-
بمشوارك بهالدني وبحياتك كلها ما تتكلي ع حدا
وما تخلي “حدا” مين ما كان يكون يشفق عليكِ
سمعيني منيح…
بدك تتعلمي وتثابري لتوصلي لأعلى المراكز
تتحدي الكل بثقافتك وتربيتك وما تخافي من حدا
بدك تواجهي بشجاعة وبعمرك ما تنحني الا ليسوع
وتتمثلي بمريم العذراء وتهتمي بمظهرك المُحتشم
بدك تكوني منظمة بأمورك كلها
وتغربلي الكل القريب قبل لبعيد
لتعرفي وين تتواجدي ومع مين
اذا شي يوم قررتي تتزوجي وتفتحي بيت جديد
فكري بابن عيلة بي يحترم أفكارك وكيانك
وبينحني لأوجاعك وبيقدر تضحياتك
اسسي معو إيد بايد عيلة مسيحيَّة ملتزمة بتعاليم يسوع
وربي ولادك على الحِشمة والمحبة
وعلميون انو الوردية هي رفيقتون بكل أيامون الحلوة والصعبة
عــ فكرة
كوني أكيدي من أول الطريق
ما رح تلاقي حدن يشيل عندك التعب
ايه…
ما حدن يا بنتي …
إنتِ وحدك رح تكافحي مع ولادك
يمكن كون أنا حدك ويمكن كون صرت بعيدي
بس تأكدي انو ما حدن لحدن…
ما تنتظري تدللي وتتغنجي
لوحدك…
بدك تكملي مشوارك
وتوصلي ولادك للقمة
مشوار الحياة مدجج بالشوك والمتاعب
بس انتي بتخلي يصير مليان زهور
بإصرارك ورغبتك إنك تحققي اهدافك
ومع الوقت اهداف ولادك…
إمك.
