زمان ما كنا نستحي نستقرض رغيف خبز من الجيران الصبح ، عشان الأولاد يتروقوا قبل المدرسة ، لأنه العجين بعد ماخمر .
زمان كنا نستقرض إبرة البابور وراس البصل وكم حص ثوم من الجيران .
زمان كانت في طاولة لجيرانا أجريها حديد تلف البلد عشان يعملوا عليها مرتبة العرسان ليلة عرسهم .
زمان كنا نستعير من بعض الكراسي والطناجر والصواني وحتى الملاعق وقت العزايم الكبيرة .
زمان كانت الناس تفتح بيوتها تستقبل ضيوف جيرانها لأنه بيت المستضيف صغير ما بساع لكل الضيوف .
زمان كان في تلفزيون واحد بالحي وساحة الدار تساع الكل ليحضروا أبو سليم وأبو ملحم .
زمان عمره ما كان حدا يعاير الثاني ، ولا حدا يشوف حاله ، لأنه الحياة كانت هات وخود .
زمان كانت الناس بسيطة وطيبة وأصيلة ومتواضعة ، لا تعايرني ولا بعايرك ، عارفين البير وغطاه .
زمان كانت الألفة والمحبة والتكافل والإنسانية الصافية من غير مصلحة .
زمان كانت طاحونة القمح اللي بسموها ” الرحى ” تجرش عليها كل نسوان البلد .
