زياد الرموز-

أوعك تفكّر اذا قعدت تبكي وتنوح الهمّ بروح… لك عمرك بروح وحياتك بتروح… لا البكي على الميّت برجّع الميت، ولا الخوف من الضربات بيمنع الضربات، ولا الدموع بتشفي مريض وبترجّع حبيب… أوعك تفكّر اذا قعدت قدام التلفزيون وتسمع الأخبار بتصير انت مسيطر على الوضع ، وأوعك تفكر اذا حضرت المجازر يلي عم تصير رح تقدر تغيّر شي…. يلي بدّو يصير رح بصير وعمبصير… أخدوا كل شي منّا، ما تخلّيهن يسرقوا سعادتك بالعيش، يمكن يقدروا يمنعوا كل شي عنّا الا العيد … العيد جايي فيّهن وبلاهن وحامل معه الفرح الرجاء الأمل والفرج للناس… العيد جايي.. قوموا تحدّوا أحزانكن وخوفكن وطفّوا الأخبار وحضّروا ولادكن للميلاد واحلام الميلاد وفرح الميلاد… خلّوهن يرجعوا يحلموا حتى يعيشوا…

قوموا حاربوا الشرّ بالخير هنّي بيزرعوا الدمار والخوف والموت والكآبة، وانتوا ازرعوا الحياة والأمل والطمأنينة والفرح ببيوت غرقت بأحزانها وتعتيرها … بلّشوا حطّوا الزينة ببيوتكن وبيوت يلي بتعرفوهن، خلّي الحزن يحمّل اغراضو ويهجر بيوتكن، تحدّوا حالكن وفكروا بولادكن وبكباركن هول ما ذنبن شي…ونسّوهن الخوف وخليهن يعيشوا الميلاد وينطروا الأمل والفرج والسلام، حطّوا الشجرة والمغارة والخواريف والرعيان ، حطوا بابا نوال هالحلم المنتظر بدل ما ينطروا الصواريخ والقزايف…

اذا زيّنتوا وضحكتوا مش يعني بطّلتوا تحزنوا بس بتكونوا رحمتوا حالكن ورحمتوا يلي حواليكن وقرّرتوا تتركوا حزنكن بقلبكن حتى ما ياخد راحتو ويكبر ويعدي الحواليكن، ومتل ما بتقول الام تيريزا يلي عم اعمله نقطة بهالمحيط بس بلا هالعمل المحيط رح ينقص نقطة… تحدّوا حالكن وعيشوا العيد وازرعوا هالأجواء بالخدمة والعمل والعطاء والمحبة… وقدّموا كل هالأعمال على نية يلي فارقونا ان كان خلف البحر اوخلف هالسما القريبة، وعلى نيّة كل مريض عم بتوجّع.

واليوم قدّمت أول مغارتين عملتن على نيّة يلي راحوا من بيناتنا ان كان على سما او على ديار الله الواسعة، وعلى نيّة كل مريض سرطان حتى ربنا يأمّن علاجن ويشفيهن ويعطيهن الصبر يتحمّلوا هالدرب هنّي وأهاليهن.

خلّوا حزنكن بالقلب وشمّروا على زنودكن وبلّشوا متلي رسالة الميلاد ، واستقبلوا العيد، العيد جايي ما بِخاف من شي