مكرم غصوب –

من شي 3000 سنه أو أكتر، بضيعه كان في حكيم يعلّم تلاميذه يححقو العداله وما ينطروها تجي من الغيب، من بين هالتلاميذ كان في شبّ مجتهد صار طبيب الضيعه والضيع المجاوره…وبيوم من الإيام بجيبوله للطبيب فلاّح وقعت عليه صخرة سيزيف وكان وضعه خطر، ولمّا بيجي ليبلّش يطببه، بتوصل مجموعه من الشباب حاملين حكيم الضيعه اللي بلّشت تخونه أنفاسه…بيوقف الطبيب بين المريضين، مش قادر يختار، بيطلّع بالحكيم اللي بقلّه “حقق العداله”!

بقلّه الطبيب:” العداله، إنّي اختار خلّص روحك، لأنّ بالضيعه في كتير فلاّحين بس انت الحكيم الوحيد.”

بجاوبه الحكيم: ” يمكن في كتير فلّاحين، بس هالفلّاح بالنسبه لأرضه هو الزارع الوحيد ولولاده هو البيّ الوحيد، مين كنت اخترت لو كنت ابنه؟”

بردّ الطبيب: “بس أنا ما بعرفه وانت معلمي، وانا بعرفك إلك وبحبك إنت.”

بقلّه الحكيم: “انت عملت طبيب لكلّ الناس، مش لإلي أنا وحدي.”

بردّ الطبيب: “انت علمتنا إنه مش دايماً العداله بالتعميم ولا دايماً بالمساواة.”

بقلّه الحكيم: “بس هو إجا لعندك قبلي.”

بيسأله الطبيب: ” إذا الزمن مش عادل بدك ياني اقدر انا كون، وين العداله إنّي انحط بهيك موقف؟”

بجاوب الحكيم قبل ما يروح على عالم الغيب: “حقق العداله وما تنطرها تجي من الغيب.”

بيبرم الطبيب صوب الفلّاح ليخلص روحه، بيلقيه هو كمان صار بعالم الغيب…

ومن يومتها بصير هالطبيب حكيم وبعلّم تلاميذه اللي لليوم بعلمو تلاميذهم، يحققو العداله وما ينطروها تجي من الغيب…