زينا خليل –

 

بيوت مئات الأمتار ما فيها حدا.. لا قرايب ولا حتى شوية زوار… لا عاد في صبحية ع الزيتون واللبنة ولا عشا ع الموقدة ليشوا شوية البطاطا وتوم

أعراس مدججي باللبس وقلة الحشمة والتزليط ع الطالع والنازل والفرقيع والطبل والزمر وما حدا راضي ومبسوط

التعازي صارت واجبات بيوصلوا كم دقيقة للحكي والتنمير وبيرجعوا يفلوا ليكملو المشوار ولا حدن دريان بوجع الإنسان الخسران إنسان بحبو

الأخوة بدل ما يعمروا بيوتن حد بعضون ليسندو بعض صاروا كل واحد بوادي ونسيوا اللقمة يلي غمسوا ايديهون فيها مع بعض …صاروا غربا عن بعض بيكذبوا وبيخدعوا بكل بساطة

ايه … الناس بطرانة

بيوصلوا ع الكرسي وبينسوا يلي وقف حدن بأوقات ضعفون

بينسوا انو الدني دولاب

حتى بينسوا انو مش رح ياخدو معون غير شوية من أعمالون يلي حكموا فيها بعدل ومحبة

البطر بخليك تظلم وتحقد والأصعب بخليك حتى تنسى اهلك واصلك وجذورك

هالناس البطرانة نسيت اهم رسالة منتعلمها وهي المحبة… بيحكموا من دون ما يعرفوا ظروف التاني …

ايه… كل شي تغير والله يستر من يلي رح يجي

ما في غير البساطة والقيم بتخلينا ننتصر بالحياة… ننتصر بالمحبة والعزة والكرامة …