سيمون سمعان –
طلاع ع ضيعتك ولو صقعة وشتي، لولا من الشتي ارضا ما زهرت بالربيع!
طلاع عبيتك لو فاضي، لأنو فاضي لازم تطلع!
طلاع وما تقول ما في حدا بالحي، بس تطلع جارك بيطلع وما في يقول ما في حدا!
طلاع اهتم بجنينتك وما تقول ما عم تعمل شي، اذا اهتميت فيا بتصير تعمل!
طلاع بتلتقى برفقة العمر، اذا ما طلعت بيخلص العمر وما بتشوفن!
طلاع ضوي البيت والحي، الضيع المطفيي بتفقد الحياة وبتصير ملفى الدياب ومقصد السراقين!
طلاع زور المرضى وهَنّي العرسان ودق الجرس يوم العيد!
طلاع وطلّع ولادك وورّتن حب الأرض مش أرض بلا ذكريات.. لأن الأرض الما إلا ماضي ما إلا مستقبل!
طلاع، بيرجع الطفل اللي فيك يشوف الساحة واللعبة وطريق المدرسة ويحلم ببكرا أحلى مش بواقع مكسور!
طلاع ع حياتك، ضيعتك بتستحق تعيش الحياة مش بس تشوف توابيت وتوعى ع يومين تعازي… وترجع تنام!
طلاع… أنت لضيعتك مش لغيرا، وضيعتك إلك مش لغيرك!
طلاع ما بتندم… بتندم أذا ما طلعت!
