اليوم لْ 44 من رحلتنا الروحيّة بالصوم والتقشّف والانقطاع نحو اللقاء الأخير بالربّ يسوع القائم من بين الأموات.

دخلنا أسبوع الآلام: أسبوع الصمت والهدوء والرجوع للذات، أسبوع الصلاة والتأمّل والدخول للأعماق.

أسبوع البحث وإعادة البحث عن “الأنا” الخاص فيي والفريد والمميّز، هالعطيّة المجانيّة من ألله بالمواهب والطاقات المتنوّعة تَ كون شخص متلو، عم صلّي متلو، عم حبّ متلو، عم أغفر متلو، عم حقق ملكوتو متلو.

أنا بحاجة لَوقفة بالصلاة والهدوء تَ إقدر إرجع شوف وين أنا من مشواري مع الربّ.

أسبوع الآلام، وقت مبارك جدّاً تَ نغوص بمحبّة ألله لئلنا ونِرجع نكتشف الحَلى لي فينا، جمال الروح والنفس يللي هنّي بحاجة يِتنقّو مع آلام يسوع.

أسبوع الآلام، هويّ أسبوع الحبّ لْ بْيخرق المستحيل وبيجعل منّي ومنَّك ومنِّك “أشخاص، أدوات طيّعة بين إيدين الربّ” تْروح للبعيد للحب لْ ما إلو حدود.

العالم بحاجة لأشخاص يحبّو متل ما حبّ يسوع…خللينا معو نقرّر بهالأسبوع نكون متلو…