مكرم غصوب-

على حيط زريبة البقر كان بيي معلَق خشبات منحوتين معقولين ببعضهن بطريقه فنيّه، مشكلين مع العنكبوت جداريّه يمكن بتشبه بمعانيها “جرنيكا” بيكاسو!

كنت بعدني كتير صغير وبدهشة الطفل سألت بيي، شو هودي اللي عالحيط، قلّي ” سكّة الفلاحه” اللي كان جدّك يستعملها. هلّق صارت للذكرى بعد ما صرنا نستعمل التراكتور.

والسكّه هي الطريق الجالس، وسكّة الفلاحه هي الطريقه الطريق، اللي عراسها يكون في نيرين، لثورين يجرّو السكّه، قرينين، يعني رفيقين، القرن عالقرن، أحلى ما تلتوي الطريق، ويطلع التلم أعوج من الثور الكبير…العقل اوقات متل الفلّاح اللي بسوق السكّه، بكبّر ثور على الثاني، ليلتفّ على حاله بس متل ما كتبت بـ “قالوا لي”، “لا قيمة لعقل يلتفّ على ذاته، مهما بلغ من الحنكة، لأنّه يعالج الوهم بالكذب والكذب بالوهم.” وأوقات العقل بكون تجاوزي وشايف وبدّه المعنى العميق، فبلفّ بالثورين القرينين لما يقلع شجره من الأرض، بس الناس ما بيقدرو يميزو لفته عن التلم الأعوج ولا حتّى الشجره من هيك كمان قلت بـ”قالوا لي”:

“أحياناً يلتوي الطريق

كي لا يتسبب في قطع شجرة

فيقولون: عدل عن استقامته

وتجاريهم الشجرة…”

ببلادنا قديماً، كان كتار يسمّو المرا (الزوجه)، قرينه، لأن كانت المرا عنّا تمشي حدّ الرجالّ، اللي لمّا صار مفكّر حاله ثور كبير، صار ثلم العيله أعوج…وبعدها صارو يسمّو المرا عقيله، وقدّ ما جمّلو بالمعنى والشرح، ولو كلمة عقيله فيها من العقل الرابط، العقيله بالأساس هي البهيمه المربوطه، اللي ماشيي ورا اللي سايقها، وقدّيش بعدنا لليوم منشوف ذكور ماشيين ونسوانهن وراهن…وبعدنا منقول “وراء كل رجل عظيم امرأة عظيمة” وبالرغم إنّه الوراء هون بتجي بمعنى الداعم، بيسوى نقول حدّ كل رجّال عظيم مرا عظيمه وما نتركها بالخلفيّه المعتمه! قول اليوم، كتار صارو متل ثيران مش ماشيين حدّ بعضهن، ثيران صايبهن عمى الألوان وعم بنطحّو بعضهن وبذكروني باللي كتبته بـ “الطارق”:

“حين عرفتُ أنّ الثور مصاب بعمى الألوان، سألتني،

هل اللون كذبة؟ أم العمى كذبة؟ أم الثور كذبة؟

…قبل أن أرى الثور أحمر.”