زينا خليل-
لليوم… وصار عندي أربع ولاد، كل ما روح ع بيت أهلي بركض بفتح البراد أول شي وبفتش وبحبش جواتو… وبرجع بلمح البصر بفتح غطا الطنجرة لشوف شو عاملي أكل… وباكول منون لو ما كنت جوعاني…
إيه…صحيح الأيام صعبة… والطنجرة ما بتكفي الكل… بس باكول من غير وعي وبرجع وبسألها : ماما ليش مش عم تاكلي ؟ بتجاوبني : أكلت قبل ما توصلو…
وبيجي العيد … وبتبلش دقلي وتخبرني عن الهدايا وشو حابي تجبلي وتجيب لولادي ..
وأنا بقلها : لشو يا ماما عندون كتير …
بتجاوبني بكل بساطة: هيدي بركة العيد …
وهي … لون تيابا من سنة لسنة ما بيتغيرو
ما تسألوني من هي الأم …
في بيوت معباية من روايح الأكل
وبيوت الطناجر فيها فاضية وبتغص من لألم
في قصص كتير وخبايا بقلب كل واحد منا
صحيح … الكل بقول الدني إم
بس الحقيقة بتقول الإم أكبر من الدني كلها …
