الاب فادي روحانا-
قرّبت حد ستّي ورحنا ندردش حد موقدة النار…
– ليش يا ستّي في ناس بتصلّي وتقيّة بس صليبها كبير؟ وفي وجع بحياتها…؟
– أوقات إبليس بيخلّي الناس تعيش بدون مصايب! لأنّو ما بدو ياهن يروحو لعند الله… وبتصير حياتن خطيّة مريحة بس محبوسين… مرتاحين بس عبيد… طريقن واسعة بس بتودّي للهلاك…وبكرا لمّا يخلص الوقت بكونو متأخرين كتير ع عرس السما والباب تسكّر!
– أتاري يا ستّي إبليس مش بقرون وعيون حُمر… هوّي بيقدر يكون حلو بس بيسمّم!
– شو بدك بسيرتو… حط إيدك بإيد العدرا وصلّي مسبحتك… وخلّي عيونك ع قلب يسوع… ولو شو ما صار، قول: كل شي منيح لولاد المسيح …
وساعتها ولعت الموقدة أكتر واتغطينا بالدفى مدري بالروح القدس… والتلج يعمّر صقعة فوق صقعة برّا وأنا وستّي نصلّي للعدرا وصوت الحطب يدق جراس…
