” ببالي مصوّرا ، مين قال رحتي ؟
قصيدة حبّ من قلبي انسلختي
وقلّك شعر ناعم متل روحك
تحت فيّات هاك الزنزلختي ..
وقصيده ، الحبّ من قلبي حكيها
هزّت قلبِك وفيها انعجقتي
ذاكر إبن سلوى ، جان فيها
ما بنسى شو بكيتي وشو ضحكتي
وفي ليله ع سطح البير كنّا
وهبّت حرقة الفرقه ، شهقتي
ذكرتْ هالغايبه بالجسم عنّا
بكلمه هزّتك فيها اندوَختي !
اشتاقتلك زهور البيلساني
المِنا زهور للعدرا قطفتي
وعا دق جراس عبّ السندياني
يا حنّه خبّريني ، ما اشتقتي ؟
قلبي طفل ، مين بيقول هيّن ؟
فراق الطفل هالعنُّو افترقتي
بألف تنّور هالقلب الحنيّن
يا حنّه ، بلهبة الفرقه حرقتي ..
بحلفلك بسلوى ، وإم سلوى
كَسرتي جانحي وقلبي جرحتي
وحيد وما إلي بهالليل سلوى
لحافي صقّع وبردان تختي … “
أسعد السبعلي ، من ديوان حنّة ..
