هونيك عا حدود القمر
بالعطر بالنسمه انغمر
بالشمس من قبل الغياب ..
يا بيتنا الخلف الضباب !
مهجور ما عندك حدا ..
وعتقت بوابك عالشتي
وعصف الهوا
والعاصفه الها صدى ..
تهجم عليك تمرجحك
كلّك سوا ..
وعم ياكل الغال الصدي
والعنكبوت استأجرك داير مدار
غرقو حجار الموقده
بالأرض والعلّيق عربش عالحجار ..
يا بيتنا الخلف الضباب !
ودرفة الشباك مشلوحه
وين ، تحت الدرب شلحتها الرياح
ومعلّق المزراب مرجوحه
راحو الأهل والعزّ بعد الأهل راح ..
يا بيتنا البيت الفقير
مين بيقول الحجر
رح ينتهي متل البشر
وبهالدني عمرو قصير ؟
يا بيتنا الخلف الضباب !
أسعد السبعلي-
