حدا منكن سمع بمقتل ودبح وطرد مليون سرياني من المنطقة السورية يللي انضمت بتآمر شيطاني للدولة العثمانية يعني تركيا اليوم متل لواء الإسكندرون ومرسين وطرسوس وقيليقية وأضنة وعنتاب وكلس ومرعش واورفة وحران وديار بكر وماردين ونصيبين وجزيرة ابن عمر،….؟؟؟
إنتو سمعتوا بقصة تجويع ربع مليون سرياني ماروني بجبل لبنان عبر الحصار أو القتل المباشر حتى الموت ووهمونا إنوا الجراد أكل الأخضر واليابس وحطوا هل المعلومة بكتاب التاريخ المزور ؟؟؟
إنتو سمعتوا بالقوافل البشرية السريانية يللي كانت تنساق للدبح بحقول الجزيرة السورية؟؟؟؟
إنتو سمعتوا بطرد وقتل نصف مليون سرياني من جبال هكاري وطورعبدين يللي صارت من بعد مجزرة سيفو مناطق كردية محط؟؟؟؟
إذا ما بتعرفوا عرفوا من بعد ما كنا بالشرق عددنا بيوصل بالملايين صرنا بالآلاف لأنو الإضطهاد بعدو مستمر من مجازر المماليك ع جبل لبنان بجبّة بشري ، زغرتا وكسروان العاصية لجبل المنيطرة ودير القمر والقبيات….
ما رح ننسى مجازر الجبل بال 1860م ولا الحصار العثماني 1914م ع جبل لبنان اللي سبّب مجاعة كانت نتيجتو ميتين ألف شهيد كما انو ما فينا ننسا مجازر العرب وع رأسن مجازر صلاح الدين الأيوبي وخالد بن الوليد ونور الدين الزنكي بحق شعبنا السرياني بأرض الهلال الخصيب يللي صاروا بسحر ساحر أبطال بكتب التاريخ يللي المفروض تكتب عن تاريخنا نحنا أبناء الشرق الحقيقيين…
شهداءنا ما بدن ذكرى ولا بكي ودموع، بدن وفا ومقاومة بأرض الشهدا مش بالتهويل من بعيد لبعيد من خلف الحدود كرمال ما يروح استشهادن ع الفاضي وما يصير وجودنا مجرد ذكرى…..
الكاتب :لبنان السرياني
