لورين قديح –
مارونيّة بتبع تعاليم الكنيسة الكاثوليكية، بقلبي مهرجان فرح إذا تمّ حقًّا الغاء المناولة الأولى بالكنيسة المارونية للأطفال بعمر ٨ او ٩ واتباع المعتمد بالكنائس الشرقية(الارثوذكسية) لجهة منحهم المناولة مباشرةً بعد نيل سر المعمودية وسر التثبيت عند الولادة.
بِزَعّل وبوجّع كتير شو عملنا بهالمناسبة!
ما بعرف أيمتى تحولت احدى أسمى المناسبات الروحية وأكثرها رمزية ووقارًا يلي بتختزن قرون من الإيمان وأعلا درجات الفداء وتضحية المسيح بجسده كرمالنا لاستعراض للجسد والقدرة المادية والثروة وتنافس على حجم الحفلة والكعكة والصور التذكارية والهدايا!
ما بعرف مين سمح يتحول تناول جسد المسيح من لحظة خشوع وتأمل وصلا، لمسرح من show off الاجتماعي !
ما بعرف مين سمح تتحول هالمشهدية الجليلة لمهرجان ترتر وريش منفوش ودربكة وطبل وعرب عرب.
يا ربّ داوود شو العلاقة بين المناولة الأولى والدبكة والمِجْوز والزلاغيط ها؟ها؟
يدخل أبو جرجورة ببدلته الأنيقة الى الكنيسة ترافقه أم جرجورة بشَباشيلها من فستان ترتر شبر وربع ظاهر منو الوِرك وقفصها الصدري و الدوالي!طيب ما بتستحي ام جرجورة فايتة عالكنيسة بالزلط؟
ليش يا بونا ما بتِحْلشها من شعرها الشينيون الحلزوني وبتقلها استري عورتك أختاه هذا بيت صلاة؟ ها ؟ ها؟
ليش يا بونا ما بتبعتوا للأهالي مع التحضيرات للمناولة يلي بتبعتوها قبل بشهر إرشادات عن اللباس ها؟
ممنوع المزلط، ممنوع اللاتيكس، ممنوع الترتر، جيبي الماسورة وقيسي الفستان من تحت الركبة نزولًا صوب الكاحل ها؟
وسؤال صادق من قلبو لقلبي :
هل فكّر حدا بالآباء يلي ما عندهم القدرة يعملوا لاولادهم حفلات؟
حدا فكر بالأطفال يلّي أهاليهم ما معهم يصرفوا عشرات آلاف الدولارات على الزفّات والكعكات والهدايا والاستعراض؟
حدا فكّر شو الجواب على سؤال طفل:
“ليش بيّي ما بيقدر يعملّي هيك حفلة؟ليش ما جابولي زفّة؟”
ليش رفقاتي وانا لا؟
وبأيّ منطق بتشرحوا لطفل أنو هالمناسبة عندها رمزيّة دينية بحتة ومن أقدس محطات الايمان المسيحية أي تناول جسد المسيح الوديع المتواضع ثم بشوف هالاستعراض الفاحش يلي ما الو علاقة بالمعنى الأصلي للمناسبة؟
