فادي سعد-
بكل بساطة، الجواب مش بالسياسة، الجواب بالهوية. يعني:
لما نقول لبنان ١٠٤٥٢ كلم٢، يعني الـشبر بالجنوب قيمتو مثل الـشبر ببيروت، بالجبل، بالشمال، وبالبقاع… يلّلي بجزّئ انتماؤو للأرض، بكون عم بجزّئ وطنيتو. فيك تكون لبناني عالحفة؟ أكيد لأ.
بالسياسة فينا نختلف على كل شي، بس لما الأرض تتعرض لعدوان، السياسة بتصير تفاصيل صغيرة. أنا بشلح توب الحزب أو التيار أو الرأي السياسي، وبلبس تياب الوطن. لأنو لما يوقع السقف، بيوقع علينا كلنا، مش بس على أهل البيت يلّلي بينقصف..
إذا ما دافعنا عن الجنوب، شو عم نترك لولادنا؟ بلد ناقص؟ كرامة مجزأة؟ الدفاع عن الجنوب هو دفاع عن فكرة لبنان القوي، الموحد، ويلّلي ما بيقبل ينكسر.
بالنتيجة؛
أنا مش عم دافع عن جهة، ولا عم فتّش عا مين غلطان، لأن حتى اللبناني الغلطان أنا معو ضد الغريب، يعني أنا عم دافع عن مرايتي.. لأنو الجنوب هو وجّ لبنان، وإذا انجرح الوجّ، كل الجسم بينوجع..
