بعدها بترسم إشارة الصليب عالعجينة هيك تعلّمت من أمها… والعجينة نعمة، بالصليب بتتبارك…ويشبعو أهل البيت ايمان قبل الخبز…
تركوني متل أمي أرسم إشارة الصليب عليِّ كل ما يدق جرس مار إليشاع حتى ولو كنت مشغول… لأنّو محبة الرب أولويّة مش اختيارية!
تركوني لمّ قطعة الخبز الواقعة عالارض وبوسا واحفظها ع حفافي الحيطان لانّها عطية السما…
تركوني صوم قبل ساعة من تناول القربان بالقداس، لأن الجوع الجسدي البسيط بذكّرني بجوعي للمسيح.
تركونا نندر نمشي حافيين عالقداس، علامة تواضع وفقر وشكر قدّام الرب…
تركونا نحط العجينة بالشجرة ليلة الغطاس، شوي وبيطل الدايم الدايم ليباركها…
تركونا نضوّي شمعة عالمقبرة ونزرع زهور، الموتى مش بعاد كتير، هنّي بالقلب، والمسيح لي جامعنا فتّح عيونن ع ضو الشمعة وعطر الزهر…
طوبى لمين آمن بشركة الحب حتى ولو ما شاف…
أمّهاتنا ما تركولنا عادات…
تركولنا طريق صغير بحبّ كبير، يوصل عَ السما…
هودي مش عادات هودي ركعات وتضرعات… قدّست عيال عيال من جيل لجيل بروح الانجيل…
الاب فادي روحانا-
